Friday, June 15, 2012
Thursday, June 14, 2012
സ്മാര്‍ട്ട്‌ഫോണ്‍ തുണയാകുന്നു; കാര്‍ഡില്ലാതെയും എടിഎമ്മില്‍ നിന്ന് കാശെടുക്കാം
വീട്ടില്‍ നിന്നിറങ്ങുമ്പോള്‍ എടിഎം കാര്‍ഡ് എടുക്കാന്‍ മറന്നാല്‍ ചിലപ്പോള്‍ കുഴങ്ങും; കൈയില്‍ കാശില്ലെങ്കില്‍ പ്രത്യേകിച്ചും. അതേസമയം, എടിഎമ്മില്‍ നിന്ന് കാശെടുക്കാന്‍ കാര്‍ഡ് വേണ്ടെന്ന് വന്നാലോ; കൈയിലുള്ള സ്മാര്‍ട്ട്‌ഫോണ്‍ ഉപയോഗിച്ച് എടിഎമ്മില്‍ നിന്ന് കാശെടുക്കാമെന്ന് വന്നാലോ...അതെ, അധികം വൈകാതെ എടിഎം എന്നത് കാര്‍ഡില്‍ നിന്ന് മുക്തമായ ഒരു സംവിധാനമായേക്കും.
ബ്രിട്ടനില്‍ ഇപ്പോള്‍ ഉപയോഗിക്കപ്പെട്ടു തുടങ്ങിയ സങ്കേതം വ്യാപകമായാല്‍, എടിഎമ്മില്‍ നിന്ന് കാശെടുക്കാന്‍ കാര്‍ഡിന്റെ ആവശ്യം വരില്ല. പകരം സ്മാര്‍ട്ട്‌ഫോണിലെ ഒരു മൊബൈല്‍ ആപ്ലിക്കേഷന്‍ (mobile app) മതിയാകും.
റോയല്‍ ബാങ്ക് ഓഫ് സ്‌കോട്ട്‌ലന്‍ഡും (RBS) നാറ്റ്‌വെസ്റ്റും (NatWest) പുറത്തിറക്കിയ പുതിയ മൊബൈല്‍ ആപ്ലിക്കേഷനാണ്, കാര്‍ഡില്ലാതെ എടിഎമ്മില്‍ നിന്ന് പണമെടുക്കാന്‍ ഇടപാടുകാരെ സഹായിക്കുന്നത്. ഈ സങ്കേതമുപയോഗിച്ച് നിലവില്‍ 100 പൗണ്ട് വരെ എടിഎമ്മില്‍ നിന്ന് പിന്‍വലിക്കാന്‍ സാധിക്കും.
ഒരു ആറക്ക രഹസ്യകോഡ് ഉപയോക്താവിന്റെ മൊബൈലിലേക്ക് അയച്ചുകൊടുക്കുക വഴിയാണ് പുതിയ സംവിധാനം പ്രവര്‍ത്തിക്കുന്നത്. ആ കോഡ് എടിഎമ്മില്‍ നല്‍കിയാല്‍ പണം പിന്‍വലിക്കാം. രഹസ്യകോഡിന് മൂന്നു മണിക്കൂര്‍ വരെ സാധുതയുണ്ടായിരിക്കും.
സ്വതന്ത്ര എടിഎം ഓപ്പറേറ്ററായ എന്‍.സി.ആറും (NCR) കാര്‍ഡില്ലാതെ കാശ് പിന്‍വലിക്കാന്‍ ഇടപാടുകാരെ അനുവദിക്കുന്നുണ്ട്. യൂസര്‍മാര്‍ തങ്ങളുടെ മൊബൈലുപയോഗിച്ച് ഒരു ബാര്‍കോഡ് സ്‌കാന്‍ ചെയ്യുകയാണ് വേണ്ടത്.
ആര്‍.ബി.എസ്.പുറത്തിറക്കിയ 'ഗെറ്റ്കാഷ് ആപ്പ്' (GetCash app) ഉപയോഗിച്ച് കാര്‍ഡില്ലാതെ പണമെടുക്കാം എന്നു മാത്രമല്ല, കുടുംബാംഗങ്ങള്‍ക്കോ സുഹൃത്തുക്കള്‍ക്കോ പെട്ടെന്ന് കാശെടുക്കേണ്ടി വന്നാല്‍ രഹസ്യകോഡ് അയച്ചുകൊടുത്ത് അത് സാധിക്കുകയുമാകാം. ശരിക്കും ലളിതവും സുരക്ഷിതവുമായ മാര്‍ഗമാണിതെന്ന് ആര്‍.ബി.എസ് ആന്‍ഡ് നാറ്റ്‌വെസ്റ്റിലെ മൊബൈല്‍ മേധാവി ബെന്‍ ഗ്രീന്‍ പറഞ്ഞു.
ബാങ്കിന്റെ സൗജന്യ മൊബൈല്‍ ആപ്പ് മൊബൈലില്‍ ഡൗണ്‍ലോഡ് ചെയ്തവര്‍ക്ക് ആര്‍.ബി.എസ്, നാറ്റ്‌വെസ്റ്റ്, ടെസ്‌കോ എന്നിവയുടെ 8000 എടിഎമ്മുകളില്‍ നിന്ന് കാര്‍ഡില്ലാതെ കാശ് പിന്‍വലിക്കാന്‍ സാധിക്കും. ഗെറ്റ്കാഷ് ആപ്പ് ഇതിനകം 26 ലക്ഷം പേര്‍ ഡൗണ്‍ലോഡ് ചെയ്തു കഴിഞ്ഞു.
കാര്‍ഡുപയോഗിച്ച് ആര്‍.ബി.എസിന്റെയും മറ്റും എടിഎമ്മുകളില്‍ നിന്ന് നിലവില്‍ 300 പൗണ്ട് പിന്‍വലിക്കാന്‍ കഴിയും. കാര്‍ഡില്ലാതെ പിന്‍വലിക്കാവുന്ന തുകയുടെ പരിധി 100 പൗണ്ടായി പരിമിതപ്പെടുത്തിയിരിക്കുകയാണ്.
മൊബൈല്‍ ആപ്പ് ഉപയോഗിക്കുമ്പോള്‍ അയച്ചുകിട്ടുന്ന രഹസ്യകോഡ്, ഉപയോക്താവ് സ്‌ക്രീനില്‍ ടാപ്പ് ചെയ്യുന്നതുവരെ മറഞ്ഞിരിക്കും. രഹസ്യകോഡ് മറ്റുള്ളവര്‍ മനസിലാക്കുന്നത് തടയാനാണ് ഈ മുന്‍കരുതല്‍.
Tuesday, June 12, 2012
വ്യൂഫോണ്‍ 3 ഇന്ത്യയിലേക്ക്‌
ഏറ്റവും പുതിയ സാങ്കേതികവിദ്യയില്‍ പ്രവര്‍ത്തിക്കുന്ന എല്‍സിഡികളും പ്ലാസ്മ ഡിസ്‌പ്ലേകളും പ്രൊജക്ടറുകളും വിപണിയിലെത്തിച്ചുകൊണ്ട് ലോകശ്രദ്ധ നേടിയ കമ്പനിയാണ് വ്യൂസോണിക് കോര്‍പറേഷന്‍. അമേരിക്കയിലെ കാലിഫോര്‍ണിയ ആസ്ഥാനമായി പ്രവര്‍ത്തിക്കുന്ന ഈ കമ്പനി 1987 ലാണ് പ്രവര്‍ത്തനം തുടങ്ങിയത്. കാല്‍നൂറ്റാണ്ടുകൊണ്ട് യൂറോപ്യന്‍ ഇലക്‌ട്രോണിക്‌സ് വിപണിയില്‍ ശ്രദ്ധേയ സാന്നിധ്യമാകാന്‍ കമ്പനിക്ക് സാധിച്ചു. മറ്റു കമ്പനികളെല്ലാം തങ്ങളുടെ ഉത്പന്നങ്ങള്‍ക്ക് ഒരുവര്‍ഷം ഗ്യാരന്റി നല്‍കുമ്പോള്‍ മൂന്നു വര്‍ഷത്തെ ഗ്യാരന്റി വാഗ്ദാനം ചെയ്തുകൊണ്ടാണ് വ്യൂസോണിക് ഉപയോക്താക്കളെ ആകര്‍ഷിച്ചത്. ഇന്നിപ്പോള്‍ പ്രതിവര്‍ഷം നൂറുകോടി ഡോളര്‍ വിറ്റുവരവുള്ള വമ്പന്‍ കമ്പനിയായി വ്യൂസോണിക് മാറിക്കഴിഞ്ഞു.
കഴിഞ്ഞ കുറേ വര്‍ഷങ്ങളായി വ്യൂഫോണ്‍ എന്ന പേരില്‍ സ്മാര്‍ട്‌ഫോണുകളും കമ്പനി പുറത്തിറക്കുന്നുണ്ട്. സിഡിഎംഎ സാങ്കേതികവിദ്യയില്‍ പ്രവര്‍ത്തിക്കുന്ന ഈ ഫോണുകള്‍ക്ക് വിപണിയില്‍ മികച്ച പ്രതികരണം ലഭിക്കുന്നത്. ലോകത്തിലെ ഏറ്റവും വലിയ മൊബൈല്‍ഫോണ്‍ വിപണിയായി മാറിക്കൊണ്ടിരിക്കുന്ന ഇന്ത്യയിലും വ്യൂസോണിക് സാന്നിധ്യമറിയിക്കാന്‍ എത്തിക്കഴിഞ്ഞു.
ഈ വര്‍ഷം ആദ്യം ലാസ്‌വെഗാസില്‍ നടന്ന കണ്‍സ്യൂമര്‍ ഇലക്‌ട്രോണിക് ഷോയില്‍ അവതരിപ്പിക്കപ്പെട്ട വ്യൂഫോണ്‍ 3 എന്ന മോഡലുമായാണ് വ്യൂസോണിക്കിന്റെ ഇന്ത്യന്‍ അരങ്ങേറ്റം. ഇന്ത്യയിലെത്തിയ ആദ്യ ഡ്യുവല്‍ സിം ത്രിജി സിഡിഎംഎ സ്മാര്‍ട്‌ഫോണാണ് വ്യൂഫോണ്‍ 3 എന്ന് കമ്പനി അവകാശപ്പെടുന്നു. റിലയന്‍സ് മൊബൈല്‍ ടെലികോം കമ്പനിയുമായി സഹകരിച്ചുകൊണ്ട് വിപണിയിലെത്തുന്ന ഈ ഫോണിന് 9,990 രൂപയാണ് വില.
വിവിധ സംസ്ഥാനങ്ങളിലൂടെ റോമിങ് നടത്തേണ്ടിവരുന്ന മുന്‍നിര പ്രൊഫഷണലുകള്‍ക്കും ബിസിനസുകാര്‍ക്കുമാണ് ഡ്യുവല്‍സിം സ്മാര്‍ട്‌ഫോണുകള്‍ ആവശ്യമായിവരിക. അത്തരക്കാരെ ലക്ഷ്യമിട്ടുകൊണ്ടാണ് വ്യൂഫോണ്‍ 3എത്തുന്നതും. ആന്‍ഡ്രോയ്ഡ് 2.3 ജിഞ്ചര്‍ബ്രെഡ് വെര്‍ഷനില്‍ പ്രവര്‍ത്തിക്കുന്ന ഈ ഫോണില്‍ 3.5 ഇഞ്ച് മള്‍ട്ടിടച്ച് ഡിസ്‌പ്ലേ ആണുള്ളത്. റിസൊല്യൂഷന്‍ 320/480 പിക്‌സല്‍സ്. 800 മെഗാഹെര്‍ട്‌സ് ക്വാല്‍കോം പ്രൊസസര്‍, 512 എംബി റാം എന്നിവയാണിതിന്റെ ഹാര്‍ഡ്‌വേര്‍ കരുത്ത്. മൈക്രോ എസ്ഡി കാര്‍ഡുപയോഗിച്ച് 32 ജിബി വരെ സ്‌റ്റോറേജ് ശേഷി വര്‍ധിപ്പിക്കാനുമാകും.
ത്രിജി, വൈഫൈ, ജിപിഎസ്, ജി-സെന്‍സര്‍, ഇ-കോമ്പസ്, 3.5 എം.എം. ഓഡിയോ ജാക്ക് എന്നിവയെല്ലാ വ്യൂഫോണ്‍ 3യിലുണ്ട്. ഇന്‍ബില്‍ട്ട് വൈഫൈ ഹോട്ട്‌സ്‌പോട്ട് ഉള്ളതിനാല്‍ വ്യൂഫോണ്‍ 3 യെ മോഡം പോലെ ഉപയോഗിക്കാനാകും. ലാപ്‌ടോപ്പുകള്‍ക്കും ടാബ്‌ലറ്റുകള്‍ക്കും ഇന്റര്‍നെറ്റ് കണക്ടവിറ്റിക്കായി ത്രിജി ഡോങ്കിള്‍ വേറെ വാങ്ങേണ്ടി വരില്ലെന്നര്‍ഥം.
ഫോട്ടോകളുടെ കാര്യത്തിലാണ് വ്യൂഫോണ്‍ 3 ഏറെ നിരാശപ്പെടുത്തുന്നത്. അഞ്ച് മെഗാപിക്‌സല്‍ ക്യാമറയുണ്ടെങ്കിലും എല്‍ഇഡി ഫ്ലാഷ് ഇല്ല. ഫ്രണ്ട് ക്യാമറ ഇല്ലാത്തതിനാല്‍ വീഡിയോ കോളിങിനെക്കുറിച്ചും ആലോചിക്കേണ്ട. എന്‍ട്രിലെവല്‍ ആന്‍ഡ്രോയിഡ് ഫോണുകളിറക്കിക്കൊണ്ട് ഇന്ത്യന്‍ വിപണിയില്‍ ചലനമുണ്ടാക്കുന്ന മൈക്രോമാക്‌സ്, സാംസങ്, എല്‍ജി തുടങ്ങിയ കമ്പനികളോടാകും വ്യൂഫോണിന് മത്സരിക്കേണ്ടിവരുക.
Subscribe to:
Posts
(
Atom
)
