മൊബൈല്‍ചാര്‍ജ് തീര്‍ന്നാല്‍ ‘മാനത്ത്' നോക്കാം

‘ഫുള്‍ടൈം റേഞ്ചി’ലായിരിക്കണമെന്ന് ആഗ്രഹിക്കുന്നവര്‍ക്ക് ഒട്ടും പിടിക്കാത്ത കാര്യമാണ് മൊബൈലിന്‍െറ ബാറ്ററി ചാര്‍ജ് തീരുന്നത്. വറ്റിയ ബാറ്ററിയുമായി രാവിലെ ഓഫീസില്‍ പോകുന്നതിന് മുമ്പ് ചാര്‍ജറില്‍ കുത്തുമ്പോഴായിരിക്കും വൈദ്യുതി ഇല്ലെന്ന കാര്യം അറിയുന്നത്. കേരള·ിലടക്കം ഇന്ത്യന്‍ നഗരങ്ങളില്‍ വൈദ്യുതിക്ഷാമം അനുഭവപ്പെടുന്ന വേനല്‍ക്കാലത്തെ പതിവ് കാഴ്ചയാണ് ഇത്. മഴ കുറയുന്ന സാഹചര്യത്തില്‍ വൈദ്യുതോല്‍പ്പാദനത്തിന് ബദല്‍മാര്‍ഗങ്ങള്‍ അന്വേഷിക്കുന്നത്പോലെ മൊബൈല്‍ ചാര്‍ജ് ചെയ്യാന്‍ ബദല്‍ വഴി തേടുകയാണ് ഹാന്‍ഡ്സെറ്റ് നിര്‍മാതാക്കളുടെ ആര്‍ ആന്‍ഡ് ഡി വിഭാഗങ്ങള്‍. ചുരുങ്ങിയ കാലം കൊണ്ട് ഇന്ത്യന്‍ ഹാന്‍ഡ്സെറ്റ് വിപണിയിലെ ശ്രദ്ധേയ സാന്നിധ്യമായ മൈക്രോമാക്സിലെ ഗവേഷകര്‍ ഈ ഒരു ചിന്തയുമായി ‘മാനത്തേക്ക്’ നോക്കിയിരിക്കുന്നതായി വാര്‍ത്ത വന്നിട്ട് നാളുകളായിരുന്നു. നാളുകളുടെ ഗവേഷണത്തിനൊടുവില്‍ ആദ്യ സോളാര്‍ പാനലോടെയുള്ള അവരുടെ ആദ്യമൊബൈല്‍ഫോണ്‍ വിപണിയിലെത്തുന്നുവെന്ന വാര്‍ത്ത കഴിഞ്ഞ ദിവസമാണ് പുറത്തുവന്നത്.

മൈക്രോമാക്സ് എക്സ് 259 എന്നാണ് ഈ പരിസ്ഥിതി സൗഹൃദ ഹാന്‍ഡ്സെറ്റിന്‍െറ പേര്. എപ്പോഴും യാത്ര ചെയ്യുന്നവര്‍ക്കും പവര്‍കട്ട് നിത്യസംഭവമായ ഗ്രാമങ്ങളില്‍ താമസിക്കുന്നവരെയും ലക്ഷ്യമിട്ട് പുറത്തിറക്കുന്ന ഈ ഹാന്‍ഡ്സെറ്റില്‍ ഘടിപ്പിച്ചിരിക്കുന്ന സോളാര്‍സെല്ലിന് മൂന്ന്മണിക്കൂര്‍ സൂര്യപ്രകാശമേറ്റാല്‍ ഏതാണ്ട് 1.5 മണിക്കൂര്‍ വരെ ടോക്ക്ടൈം ലഭിക്കും. 240*320 റെസല്യൂഷനുള്ള 2.4 ഇഞ്ച് QVGA ഡിസ്പ്ളേ ആണ് ഇതിനുള്ളത്. വി.ജി.എ കാമറ, വീഡിയോ ആഡിയോ പ്ളെയറുകള്‍, ബ്ളൂടൂത്ത·് ,എഫ്.എം റേഡിയോ എന്നീ സൗകര്യങ്ങളുള്ള ഇത് ഡ്യുവല്‍ സിം ഫോണ്‍ ആണ്. നാല് ജി.ബി വരെ മെമ്മറി വര്‍ധിപ്പിക്കാവുന്ന ഈ ‘ഹരിത’ഫോണിന് 1000 എം.എ.എച്ച് ബാറ്ററിയാണ് കരുത്തേകുന്നത്. വിപണിയില്‍ ഉടന്‍ ലഭ്യമാകുന്ന എക്സ് 259ന് 2499 രൂപയാണ് വിലയിട്ടിരിക്കുന്നത്.